पावसाळी सेल...

काही आठवणीतील भावना आहेत
विकायच्या
पावसात भिजलेल्या...

पण
हळव्या भावनांना
अन पावसात भिजून
चुरगळलेल्या नोटेला
किंमत असते शून्य
व्यवहारी जगात...

म्हणूनच न दिसणाऱ्या
फक्त जाणीव करून देणाऱ्या
चलनी व्यवहारात
खोट न खावू देणाऱ्या
भावनांचा
पावसाळी सेल लावलाय....

डिस्काऊंट ???
शंभर टक्के
म्हणजे फुकटातच
कारण भावनांना किंमतीचे
लेबल नसते
त्याला असतो
तलम न दिसणारा धागा
ज्याला दिसेल त्याची ती भावना
न दिसणाऱ्याला
जाणवेल
पावसाची विनाकारणांची
रिपरिप....


-सुरेश तु. सायकर