"ती"....

अनुभवलंय का तू मला,
कि फक्त भोगलंयस,
नजरेनं...


अनुभवणं म्हणजे काय ?
हे तरी माहिती आहे ?  
ग्रीष्मातल्या काहिली करणाऱ्या रानात,
आसुसलेल्या ढेकळांमध्ये,
जेव्हा पाटाचं पाणी वाहत तळपायाला येऊन लागतं,
तेव्हाचं तापलेल्या मातीचं आणि पाण्याचं एकजीव होणं,
कधी अनुभवलंय...


ते अनुभव,
ते अनुभवलंस तरच समजेल,
उपभोगणं आणि अनुभवणं यातला फरक....  
  

एकजीव होणं,
आणि हक्काचं म्हणून कधीही पायदळी तुडवणं,
यातला फरक जेव्हा समजेल,
तेव्हाच समजेल, "ती"....




- सुरेश तुळशीराम सायकर