काही तरी कारणाने मूड खराब झाला होता. डोक्यातून काही केल्या तो विषयच जात नव्हता. मार्केटयार्ड मधून जाताना थोडी कसरतच असते ट्रक रस्त्यावरच उभे केलेले असतात आणि अशातच साधारण १२ ते १४ वर्ष वयोगटातील दोन मुले रस्ता ओलांडत होते. मी माझ्या विचारात आणि ते त्यांच्या आनंदात आणि इतक्यात दोघांपैकी एकजण पुढे जाता जाता एकदम थांबला हे अचानक घडल्यामुळे मी विचारातून भानावर येईपर्यंत आणि त्याला वाचवायला गाडी बाजूला घेईपर्यंत तो मुलगा गाडीवर आदळला स्वतःला लागू म्हणून डिफेंस मोड मध्ये त्याने त्याचा हात गाडीच्या हेडलाईट वरील पेनेलला लावला. मागचा पुढचा विचार न करता मी खाड्कन त्याच्या थोबाडीत लगावली. ते एकदम कोमजलच....ते एवढंसं बारकं माझ्या फटक्याने कळवळलं...निरागसपणे माझ्या डोळ्यात बघत होतं...बहुतेक त्याला सांगायचं असावं की तू गाडी चालवताना विचाराच्या तंद्रीमध्ये चाललेला होतास आणि निट लक्ष नाही असं वाटून मी अचानक थांबलो होतो. त्याच्या कानाखाली लावल्यावर देखील मी त्याला बडबड करतच होतो. तरीही तो शांतपणे गालावर हात घट्ट धरून रस्ता ओलांडत होता. त्याचा मित्र त्याच्या हाताला धरून त्याला घेवून जात होता. मला वाटल शेजारच्या झोपडपट्टी मधली मुलं असतील आणि छोटी असल्यामुळे मारू न शकणारी मला कमीतकमी शिव्या घालून तरी जातील पण असं काहीच घडलं नाही. बहुतेक बाजूला असणाऱ्या एखाद्या हॉटेल मधली कामगार असावीत ....
राग शांत झाल्यावर मलाच नंतर अपराध्यासारख वाटायला लागलं आणि ठरवलं कि त्याला भेटून त्याची माफी मागायची. काहीही कारणाने त्याला हसवायचं जेणेकरून तो कालचा प्रकार विसरून जाईल. रोज येताना त्या ठराविक भागामध्ये त्याला शोधायचा प्रयत्न केला, तिथल्या हॉटेलमध्ये पण विचारून पाहिलं पण तो मुलगा परत कधीच दिसला नाही. मनमोकळ्यापणाने माफी मागायची होती ती खंत मनामध्ये तशीच राहिली.
बरीच वर्षं उलटून गेलीत या घटनेला त्याचा चेहरा सुद्धा नीट आठवत नाही आठवतात ते फक्त त्याचे डोळे...पाण्याने भरलेले. त्यादिवशी तो ज्या निरागसपणे माझ्याकडे बघत चाललेला होता त्याच्या डोळ्याला डोळा भिडवणे पण मला शक्य होत नव्हतं. रात्रभर बहुतेक झोपलंच नसावं, कळवळला असेल खूपच, त्याच्या आईला सांगितल्यावर तिने माझ्या नावाने कडाकडा बोटं मोडली असतील. रात्रभर सुजलेल्या गालावरून अश्रू ओघळले असतील, ती रात्र तळमळत जागूनच काढली असेल त्याने आणि त्या दिवसापासून मात्र माझी झोप उडालेलीच आहे... कायमची